Taon, m. monosyll. Que le François prononce Tan, comme de Laon, Lan, de Caën, Can, est une espece de grosse mousche bruyant quand elle vole (duquel bruit tonant luy a esté donné tel nom) laquelle poinçonne cruellement les vaches, chevaux, et autres telles bestes, et les tourmente fort en temps d'Esté. Aucuns l'aspirent en escriture, Tahon: mais c'est sans propos. Il vient de Tabanus mot Latin, fait par onomatopoee. Le Languedoc suit ledit mot Latin, et le nomme Tavan, acut. L'Espagnol de mesme Tavano, et l'Italien Tafano, aigrissant la consonante v, ce qui est pour ceux qui l'aspirent escrivants Tahon. laquelle aspiration l'Italien tourneroit en digamme Aeolique. Si dit il, aussi Tavano, aestrum, Asilus.