Pourparlé ou plustost, Pourparler, Nom m. acut. Est l'entremise et deduction de parole en allées et venuës, et le devis, qui sont faits par mediateurs, ou par les parties principales pour parvenir à un accord, soit de paix, trefve, surseance d'armes, mariage, ou autre telle chose, Praefationes. Apres lesquelles s'ensuit le traicté d'accord et convenances, Car le Pourparler ne contient que les expedients et moyens advisez pour parvenir au traicté. Et est composé de Pour preposition designative de futur effect (laquelle aussi amplifie et parfait la signification des mots ausquels elle est joincte par composition, comme en ceux-ci, Pourpenser, Pourplanter, Pourprendre, Pourquerre, Poursemer, et semblables) et de Parler, qui est nom quand il se prent pour parlement, devis, propos. Aucuns disent Proparlé et Proparler, à quoy respond prolégoménon, Grec, et Praefatio Latin.